ਵਾਸ਼ਿੰਗਟਨ, 8 ਜੁਲਾਈ : ਅਮਰੀਕਾ ਨੇ ਇੱਕ ਵਾਰ ਫਿਰ ਦੁਹਰਾਇਆ ਹੈ ਕਿ ਪਾਕਿਸਤਾਨ ਦੇ ਕਬਾਇਲੀ ਇਲਾਕਿਆਂ ਵਿੱਚ ਹੁਣ ਵੀ ਅਲ ਕਾਇਦਾ ਦੇ ਅੱਤਵਾਦੀ ਸਿਖਲਾਈ ਕੇਂਦਰ ਸੰਚਾਲਿਤ ਹੋ ਰਹੇ ਹਨ। ਹਾਲਾਂਕਿ ਓਬਾਮਾ ਪ੍ਰਸ਼ਾਸਨ ਹੁਣ ਵੀ ਇਸ ਗੱਲ ਤੇ ਕਾਇਮ ਹੈ ਕਿ ਉਸ ਨੂੰ ਪਾਕਿਸਤਾਨ ਵਲੋਂ ਅੱਤਵਾਦ ਵਿਰੋਧੀ ਖੇਤਰ ਵਿੱਚ ਲੋੜੀਂਦੇ ਯੋਗਦਾਨ ਦੇ ਸਬੂਤ ਮਿਲ ਰਹੇ ਹਨ। ਅਮਰੀਕੀ ਨਿਆਂ ਵਿਭਾਗ ਵਲੋਂ ਦਾਇਰ ਇੱਕ ਦੋਸ਼ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਨਿਊਯਾਰਕ ਦੀ ਭੂਮੀਗਤ ਆਵਾਜਾਈ ਪ੍ਰਣਾਲੀ ਵਿੱਚ ਬੰਬ ਧਮਾਕੇ ਦੀ ਸਾਜਿਸ਼ ਪਾਕਿਸਤਾਨ ਦੇ ਅਲ ਕਾਇਦਾ ਦੀ ਅਗਵਾਈ ਨੇ ਕੀਤੀ ਸੀ।
ਸਾਜਿਸ਼ ਨਾਲ ਜੁੜੇ 11 ਪੰਨਿਆਂ ਦੇ ਦੋਸ਼ ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਦੋਸ਼ੀਆਂ ਵਿਚੋਂ

ਪੰਜ ਨੂੰ ਵਜੀਰਿਸਤਾਨ ਵਿੱਚ ਸਿਖਲਾਈ ਮਿਲੀ ਸੀ। ਦੋਸ਼ੀਆਂ ਨੇ ਸਾਲ 2008-09 ਦੌਰਾਨ ਅਲ ਕਾਇਦਾ ਤੋਂ ਟ੍ਰੇਨਿੰਗ ਲਈ ਸੀ। ਅਮਰੀਕੀ ਅਭਿਯੋਜਕਾਂ ਨੇਦੋਸ਼ ਲਗਾਇਆ ਹੈ ਕਿ ਅਲ ਕਾਇਦਾ ਅਗਵਾਈ ਨੇ ਦੋਸ਼ੀਆਂ ਨੂੰ ਹਮਲੇ ਲਈ ਨਿਰਦੇਸ਼ ਦਿੱਤਾ। ਦੂਜੇ ਪਾਸੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਮਾਰਕ ਟੋਨਰ ਨੇ ਕਿਹਾ ਕਿ ਅਮਰੀਕਾ ਨੂੰ ਇਸ ਗੱਲ ਦੇ ਲੋੜੀਂਦੇ ਸਬੂਤ ਮਿਲੇ ਹਨ ਕਿ ਪਾਕਿਸਤਾਨ ਅੱਤਵਾਦ ਨਿਰੋਧ ਵਿੱਚ ਜਿਕਰਯੋਗ ਸਹਿਯੋਗ ਕਰ ਰਿਹਾ ਹੈ।